Ngiga Gud!

Duaw

2006-09-13T21:32:00.001+08:00

Mingawon pud baya ko ani nga blog. Bisan tuod ug daghan na ko ug laing blog, unya klaro sad nga wa kaayo nako ni hatagi ug daghang atensiyon, mahunahunaan man gihapon nako ni. Ing-ani man jud tingali ang kinabuhi. Daghang butang nga ato lang gipasagdan kay gasalig ta nga kanang butanga magpabilin kung asa man nato siya katapusan nga nakit-an. Hapit na mugawas ang October 2009 CPA Board Exams Results.

'Bagay Bay!

2006-07-31T00:41:00.000+08:00

Nakit-an nako ni nga kudak namo ni Manny Pacquiao sa dihang gilili nako akong photobucket account. Di pa kaayo siya sikat ato. Gabilliard mi's akong mga migo sa Coronado Lanes (nahanaw na na nga building sa Makati) unya kalit nga naay gikagubtan. Si Manny diay. Hunahuna pa nako atong panahona, "tinuod jud diay nga sugarol ning tawhana". Lingo-lingo na lang ko. Giswerte nuon to siya atong gabhiuna kay murag nidaug man siya bisag gihatagan niya'g partida iyang kontra. Mga P200K kuno ilang pusta ato. Ambot lang unsa katinuod pero mao may akong nadunggan.

Sa dihang nagpahuway kadali si Manny, nagkisikisi akong mga kauban (upat man mi kabuok).

"Papicture tayo pare!" ingon pa sa usa.

"Punyeta ang jojologs nyo!" matud sad nako samtang gatira.

Abi nako'g gabinuang ra ang mga igat, pastilan niduol jud ang usa kang Manny.

"Sir Manny, Sir Manny, pweding magpapicture?". Niduko na lang ko sa kaulaw.

Pero bilib sad ko ni Manny kay game sad, nitupad dayon sa akong mga migo unya ningisi. Ah, asa sad ko palupig, dagan dayon ko dungan smile sa luyo. Jologs na kung jologs.

Ang resulta, ang akong migo nga niduol kang Manny, mao na nuoy nahimong kodaker! BWAHAHAHAHA!!!!

Bisaya sa Taliwala sa Manila

2006-07-11T17:27:00.000+08:00

Dugay dugay na sad ko wa naka post diri da. Lisud lagi ning daghan ta'g blog kay magkabuang ta ug unsay unahon. Unsaon kay latagaw man kaayo ko'g panghuna-huna mao nga apil mga sinulat hastang gubota sad. Apan naay mga panahon nga gusto lang nako mabasa ang akong hunahuna sa akong sinultiang namathan. Usa ni sa mga panahon.

Ang sukdanan kuno kung unsa na ang lebel sa pagsabot sa tao sa usa ka sinultian o lenggwahe mao ang abilidad sa paghunahuna gamit ang nahisgutang lenggwahe. Ug mahimo na kuno na nimo, usa na na ka timaan nga medyo eksperto na ka ana nga sinultian. Ambot lang kung unsa ka tinuod kay bitaglish man usahay ang akong hunahuna.

Maayo gani diri sa opisina kay naa say bisaya nga makaistorya nako kada adlaw. At least, makapraktis pa gihapon bisag unsaon. Kapoy lang usahay kay maslide pa gihapon akong dila kung mag-istorya ko sa ubang tawo o bisag magduwa lang ug badminton.

Nakahinumdum pa ko usa ka adlaw nga kuyog nako akong mga kagrupo sa baddicts (usa ka online badminton community) unya wa jud ko gapahibalo nga bisaya ko. Naa na gyud tingali silay idea nga bisaya ko pero maulaw lang mangutana kay magtinagalog ra man ko kanunay. Sa usa namo ka duwa, pirting pagkaclose-fight kaayo. Pirting hinapakay namo sa shuttlecock. Since medyo hinay man gamay akong partner, sige lang ko ug encourage niya. Sa usa sa mga rally, dugay-dugay namatay ang bola, hesus nailad man na siya. Abi niyag ilobo sa among kontra so niatras siya, gi-dropshot man diay. Nakasyagit ko ug ahat ug "KUHAA!".

Matud pas akong usa ka kuyog nga bisaya; "Da, guwa lagi nang pagkabisaya nimo."

Atay.

Tiguwang Gikulata ug Batan-on

2005-12-04T13:39:00.000+08:00

Mao pa gyuy pagkahuman, gibun-og ni Jermain "Bad Intentions" Taylor (27 yo) si Bernard "The Executioner" Hopkins (40 yo) sa sud sa 12 ka rounds sa boxing ganina.

Ako lang masulti? Bulikat nimo Hopkins! Bwahahaha.

Sa ilang unang sinumbagay, napildi si Hopkins pinaagi sa split decision. Grabeng tyabaw sa tiguwang kay gilimbungan kuno siya. Daghan sang mga eksperto ang niuyon sa iyang gisulti.
Daghan kaayo siyag gipangyawyaw pagkahuman sa duwa, nga lagi di kuno tinuod nga champion si Taylor, nga kulatahon nya kuno niyag maayo sa ilang rematch etc.. etc..

Dili sad nuon lalim ang nawa niya kay unification bout man tong ilang unang duwa. 3 niya kakorona ang gipusta ato nga duwa, ug usa kang Taylor. Suma-tutal, 4 ka korona ang nakuha sa ni Taylor.

Kung ang ilang duwa duwa sa buotan ug sa dautan, si Taylor ang masulti nga buotan kay matud pa sa mga nakaila niya, maayo kuno ug pamatasan si Taylor. Bag-o nisud sa professional boxing si Taylor, nidaug na kini ug bronze medal sa Athens Olympics mao nga dili sad kini basta basta nga boksingero.

Sa mga komento ni Hopkins bahin sa ilang unang duwa, murag naulit sad si Taylor. Ingon pa niya nga dili kuno angayan si Hopkins nga nahimong champion ug ing-ana iyang batasan. Ug mapildi kuno, unta dawaton sa maayong kabubut-on ang iyang kapildihan. Matud sad niya, siguraduhon niya nga wa nay daghang mga pangutana pa pagkahuman sa ilang rematch.

Ug kaganina lang, gipakita ni Taylor nga siya gyud ang tinuod nga maayong laki.

Si Hopkins, nga abi sa daghang tawo nga mas mahimong agresibo sa ilang ikaduhang dula, wa gihapon gibag-o iyang style. Maghuwat ra gihapon siya kang Taylor nga mubuhat sa unang lihok aron iyang macounterpunch. Ang kapait lang kay mas maayo na mosumbag si Taylor, unya iya sang gipacing iyang kaugalingon. Mao nga pag-abot sa mga katapusang rounds kung kanus-a expected nga mo-atake si Hopkins, wa gihapon siya kapuya ug nakabaws pa gihapon siya sa mga gibuhiang mga sumbag ni Hopkins.

Ang resulta? 115-113 sa tanang scorecard sa mga hurado. Unanimous decision para ni Taylor.

Ambot ug unsa na say pasangil ni Hopkins karon, pero sigurado ko napahilum ni Taylor ang tanang tawo nga nagduda niya.

Sa tinuod lang, ug dili ka hardcore nga boxing fan, medyo boring ang ilang duwa, kay wa may natumba o naduguan man lang. Mas ngilngig gihapon nga tan-awon si Pacquiao.

Pero sa middleweight division sa boxing, mao na siguro ni ang ginatawag nga "changing of the guards". Mao na ni ang panahon nga ang mga dinosaur nga pareha ni Hopkins mo retire na para makakita na ta ug mga bag-ong dugo nga mopaambit sa ilang abilidad.

Iring-iring

2005-12-02T13:27:00.000+08:00

Nakalimot nako sa title sa usa ka sikat nga kanta didto sa Sugbo kadtong college pa ko. Di ko sure kung Brown-out ba ang title ato basta kay naa toy linya nga “mag-disco, mag-swimming, mag-iring iring". Maurag 40 the Band man tingali ang nikanta ato.

But anyway, nahuna-hunaan ra nako kay nag-leave ang akong boss ug 3 ka buwan. Korek! Mabdos ug manganakay na. Bwahahaha! Kalami sa kinabuhi. Murag tanang miyembro sa akong team gusto nako hagkan. Hehehe. Pugong lang kay masexual harassment nya ta.

Wa man hinuon koy problema sa akong amo, usahay lang kay murag paminaw nako di kaayo ko makadiskarte kay lahi man iyang management style. Murag micro-management ba. Murag dili tukma sa empowerment culture sa among opisina. Gawas ana, morag ok na man siya kay kamao man sab, naay gamayng pagkaOC, typical sa mga perfectionist.

Ang usa lang nako pa nga reklamo kay arang tihika! Ok lang kung ang leadership team iyang pakaunon, way problema, pero ug morequest na gani ka nga mopakaun sa imong kaugalingong team, atay, kinahanglan pa ka nga moaagi sa bangag’s dagum. So since wala siya, unya ang nadelegate nga mopuli niya amerkano, happy days are here again na sad. Hehehe. Yuna pa, basin mogawas nga abusado ko’s among gastos, dili pud nuon, gusto lang nako nga murag naa sad unta miy gamay nga leeway para modecide para sa among kaugalingon kung kanus-a namo pwede pakaunon ang among team.

Ug Di Pa Lang Sala

2005-11-02T01:53:00.000+08:00

Buang ni’s Jr. Kilat, maayo gyung pagtapot sa iyang kanta sa akong utok mao nga samtang gadrive sige kog gayawyaw “ug di pa lang sala ang mamaak..” nakalimot ko nga kuyog man diay nako akong palalab, natas’an nuon ko ug kilay.

“Unsa man na imong kanta uy!” Bwahahaha. Kaluoy sa uyab, behind na kayo sa times.
Sugdan unta nako’g explain nga kanta to ni Jr. Kilat pero hago na. Nihunong na lang ko.

Usahay makahunahuna ko nga murag wa man niagi ug insaktong pagkadaga ning akong pasahero kay unsaon man lagi, pirti mang pagkanegosyante-- pero lahi-lahi man sad ta ug hilig. Ang uban ganahan magparty, ang uban ganahan mangita’g kwarta.

Pero balik ni Jr. Kilat, gi-introduce ko aning grupoha sa akong migo nga tagaSugbo, ako sang gishare sa akong mga amigo dinhi nga kamao gamay mobinisaya. Nakurat man ko kay pirti man nilang lingawa. Ambot ngano. Siguro bag-o nga experience para nila nga makadungog ug kanta nga binisaya nga in a way dili gikan ni Max Surban or ni Yoyoy Villame.

Dagha’y nangutana ug unsa ang sigbin (usas mga kanta), daghan say nitubag. Wa na lang ko niapil ug tubag kay mas lingaw man paminawon ang ilang mga creative kaayo nga mga gipangtubag. Wa sad koy kasingkasing nga icorrect sila. Bahala na sila ug mutoo kang kinsa man sila gusto mutoo.

Ambot ug nadayon ba tong concert nila dinhi katong Oct. 25. Gahinam-hinam unta ko nga motan-aw pero atay ning ulipon ta sa corporasyon kay pirti man gyung daghana natong buluhaton sa matag adlaw mao nga nawa gyud sa akong hunahuna ang ilang concert. Sige lang, basig makatan-aw ra ko nila nga moperform ug makabisita na sad ko sa cebu. Mag-igo na lang sa ko sa pagpaminaw sa ilang CD. Hinaut unta nga makatabang ni ilang sonata para di ko makatug kay daghan pa ko’g humanon. Haay ! Kapait ning kinabuhia.

Kalag-kalag Na Sad

2005-10-27T19:14:00.000+08:00

Gikapoy na ko ug paabot ug inspirasyon mahuman lang ang akong primirong gisuwat. Sa pagkatinuod niandar ra gyud ang akong katapulan mao nga wa natiwas tong akong sugilanon. Haay, hapit na ang kalag-kalag ug samtang naningkamot ning akong mga kaopisinag panapot ug bisag unsa na lay mahuna-hunaan para modaug sa among halloween design contest diri, gapasagad ra sad ko ug type para mabisbisan man lang bisag gamay ning nangliki nas kauga nako nga blog.

Bibo ra pud baya diri sa opis. Malingaw ka maminaw sa mga tinagawg sa katawhan nga hibaw-an kaayo nga wa nagdako sa manila. Pinakaklarex ang mga Ilonggo kay bisag unsaog tago, mo sipyat gyud panagsa unya mogawas dayon ang lawit sa ilang sinultian. Bisan ako, sa kadugayon na nako diri sa dakong siyudad mogawas pa man gihapon ang kagahi sa akong dila. Ang kagahi sa dila nga gipangita sa mga taga Manila. Bwahahaha!

Unsay di nako buhaton makauli lang sa kalag kalag! Lisod ning anak sa pobreng unggoy kay di ta makadali-dali ug uli. Kay bisan tuud ug naa may barko nga mas bubarato kumpara sa eroplano, hastang dugaya man sad moabot. Ug mag-eroplano sad, mabuslot man sad atong bulsa sa kamahal. Pastilan kaguol.

Sige na lang. Manghinaut na lang ko nga naa sa maayong panglawas tong akong mga mahal sa kinabuhi, daghan pa man hinuuy higayon nga magkakita mig usab.

Ang Sugilanon Sa Akong Panit

2005-07-31T11:36:00.000+08:00

Ambot ug unsay seremonyas kung mao pay una nimo nga entry sa blog. Wa ko kasayud pero wa man sad tingali balaud nga nagadili sa pagsuwat bahin sa imong pers taym.

Mangayo ko ug pailob ug madisappoint ka sa akong isuwat. Ug gahunana-huna ka nga pagahi nig ugat, basin ganahan ka nga manglili na lang sa laing blog.

Kining akong sugilanon bahin sa akong pers taym nga pagtungtong sa Manila para maningpad. Pero igo na ning yawyaw, adto na tas koros.

Adtong una, ang ako ra gyung mahuna-hunaan basta makadungog kog manila mao ang tila. Unsaon man ning mga maldito kaayo nakong mga paryente nga kung pangutan-on ug mag-unsa sila sa Manila, ang paspas kaayong tubag-- magpatila. Na, maayo gyung pagpilit sa akong hunahuna atong ilang mga binuang nga istorya, mao nga ug naa ganiy muadtog manila, wa juy laing buhaton ngadto kundi magpatila.

Nidako ko sa barrio nga mohunong ang pagpanglubo ug mais kung magsugod na ang drama ni Teban ug Golyat, ang mahinumduman pa nako nga basta mosulti na gani tung bayi, "Teban, bagdoki ko." mag-ikid ikid na dayon ang tanan sa pangatawa. Pagkahuman ug paniudto kaming mga migo, manago dayon bitbit ang AM Radio kay maminaw ug Verboten. Hehehe. Sa gabii kanang mosawp na ang adlaw, ang paminawon na sad namo-- Ang Anay nga Gabakya. Sa ako lang, murag mas grabe pa man ang kahadlok nga among nabatian sa pagpaminaw namo adtong una aning mga programa sa radyo kay ikaw man ang mohimo sa imong kaugalingong mga ungo ug mga wakwak sa imong utok. Di pareha karon nga TV ug sine nay sikat. Pero nawa na ta sa atong istorya.

Sa dihang maghayskul na ko, basta na gani miy maclassmate nga tagalog, ambot ngano nga mahambogero man jud. Tungod tingali kay lahi sila? O kaha nag-gikan sila sa lugar nga mas sibilisado? Apan bisag unsa pa man, usa ra may among buhaton mahilom na man dayon. Tagalog putig itlog! Da, tagam lagi dayon basta magsugod na siyag pamagarpar. Hinuon dili man tanang tagalog hambugirit pero unsaon nga matiming man gyud nga maclassmate gani nako, mahambogero man dayon.

Usa pud tingali sa mga rason ngano nga wa jud ko nangandoy nga moeskuyla sa Manila gawas sa akong mga hambogero nga classmates mao ang akong lolo (mahiluna unta siya). Labihan ba sad ka anang moistorya siya nga ang mga dyip sa Manila ug manaog ka dili mohunong. Kinahanglan ka moambak. Unya ingon pa niya, kada lihok kuno gastos. Atay, bisan diayg manghuy-ab ta naa diay bayad.

to be continued...